Dal primo, unico, vero, autentico, originale (e frizantin come el vin novo)  “Calendario Veneto”

CONSIGLI  UTILI PER LA DONA DE CASA

Offerte speciali

Co’ andé a far spesa al Centro comerciale, no sté mai comprare prodotti “da qualche euro in manco”. I xé quéi de qualche bidon in più.

Tredicesima

Écola finalmente qua, dopo un ano intero de sacrifici! Che festa, che bazza, quanti salti in fameja! Rivà giusta in broca par pagare le bolete de fine ano…

Roture del tubo

Sio stufe del solito idraulico ch’el ve fa penare co’ le visite a domicilio? Problema risolto: stavolta la perdita portéghela a lu diretamente

Ripieghi

Se si’ sempre al telefono a ciacolare  co’ le amiche e vostro marito a un bel momento el ve taja i fili o el buta el celulare fora dalla finestra, a gh’è sempre na risorsa contro la solitudine: el citofono.

Se gavì el can

Se Fido scapa de casa, xé inutile che metì un aviso sul giornale. I can no sa lézare.

Co manca l’’esperienza

Ma no, signora, ela la sarà zòvane e moderna fin che la vòle, ma la sapia che per i bisi no se usa mai el cortelo!

La spesa

Ste’ atente de no pèrdare la carta de credito, anca se el fortunà  che la cata el spenderà sempre manco de voaltre.

Sorapeso

Se le vostre amiche le ve domanda come che va la dieta, dimostrèghe el massimo dela sodisfazion, parchè oramai gavì deciso de scominziarla proprio doman.

Gran varietà

Se in fameja i xé stufi agri de pizza da asporto, cambié cusina, che gh’è anca i piatti cinesi da asporto.

Economia domestica

Le done de casa che xé sempre al verde, prima de tuto le dovaria fare in modo de non usare più i schei per pagare i conti.

Colaborazion

Se gavì el marìo che l’è apena andà in pension e pronto a darve na man co’ raqualche lavoro de estrema fiducia e responsabilità, contentèlo subito, poareto,  faséndoghe lavare i piatti.

Essar brave coghe

Prima de tuto, usé la massima gentilezza in fameja, domandàndoghe a tuti ogni giorno cossa che ghe piasarìa trovare par pranzo, chè gh’è sempre pronto el solito polpetòn…