Eà go vista cressare

tenarina e deicata:

“ma tanto bea”

diseva so mama… beata!

Pianeto el tenpo passava,

tra na caressa e un piantareo,

un bacajar e qualche dispetin.

Ma robe da gnente, tuto sol normae

e quasi de boto

m’eà so vista za granda, come xe naturae.

Eà vita xe cussì.

Te fe tanto pa st’anemeta

e dopo riva un marìo

chel s’ea trova za pronta e parfeta

e ti bisogna anca che t’eò ringrassi

e te te ciami contento,

che no eà resta da maridare

ma ea vaga via come el vento.

Pa fortuna xe ‘ndà tuto bene

e fra mare e fioea

vedevo ch’è scuminsiava

confidarse e prime pene.

Nol durava a eongo el mistero

parchè poco a poco

eà panseta de sta tosa deventava

senpre più tonda del vero

e no gera…. pal magnare..!

Da sto momento,

pareva chel tenpo

nol passasse mai.

Ma eà natura fa el so corso

e dopo nove mesi,

xe ‘rivà ‘sta creatura;

“eà più bea dea natura!”

Questa eà grasia più granda,

chel Padreterno gà inventà

parchè continua ea vita chel ga creà.

A semo tanto abituài a sto bel dono,

che gnanca ghe pensemo

se eò meritemo.

                               Ceronte