EL SOPEGA 

– Gheto visto come se ga ridoto Menego? – Xe vero, el vien ‘vanti tuto de sopegòn.

– Secondo mi el xe ‘rivà…, sarà question de mesi, de sicuro no’l riva miga a sto ano che vien. Pensare quanto spiritoso che’l gera, ghe piaseva ea conpagnia, andava ben anca quea…feminie, sensa fare insinuassiòn…! Ogni tanto el scriveva anca qualche poesia in diałeto pa i amissi, sensa pretese, cussì aea bona quando ghe vegneva l’ispirassiòn! – Dirte ea verità, a mi no pare miga che’l sia ridoto cussì mae. El xe un fià paideto ma insoma che’l sia quasi drio tirare e ache no credo.

– Tasi che’l xe qua da drio, no voria che’l sentisse, xe mejo che canbiemo discorso. – Ciao Menego come va ea vita, te vedo ben…- dise Toni, el più finton dei do. – Ciao tosi, no ghe xe mae, sò soło scapussà so ‘na busa de un ramengo de marciapie e me so smolgà un pie, gnente de roto par fortuna però fin che speto de scominsiare e terapie me ‘iuto co sto baston, camino più voentieri sensa tanta fadiga, ansi, me xe vegnù da ridare quando n’amiga me ga dito che paro bon e cussì gò pensà che podaria torme ‘na bagołina da  doparare anca dopo che stago mejo. Soło par mafia!

Toni e Bepi i se scanbia ‘na ociada de intesa, come a dirse: el crede che sia soło el pie che ghe fa mae, no’l se ga miga vardà al specio che siera che’l ga? ….e cussì senpre Toni, el più finton, el ghe dise:

– Ma serto che te farissi ea to bea figura, però inportante…xe ea salute e ti – col tono de uno che no ghe crede – se vede che te sté ben!   Odìo, ventani i gò passà da un toco, perciò me contento de come che stago. Del resto mi digo che se no gavesse i małani che gò… staria proprio benon! Ansi voìio che ve diga dove so drio ‘ndare; no ve ło imaginé gnanca morte morire, a vago al’Avis pa dare el sangue, fin che so drento co l’età. Pitosto voaltri come steo?

Ciapà cussì de contropie i xe restà tuti do co’ea boca verta come do panpałughi.

–   Ma disi ea verità che te ve dare sangue? – Ve pare che gabia ea facia de uno che schersa? Ansi, parcossa no vegnìo anca voaltri. Se trata de perdare mes’oreta qua in centro parochiae. Ghe xe i dotori che ve controła ea salute e se sté ben i ve iscrive so l’elenco dei Donatori e dopo, ma sicuramente ło savì za, con un spuncionsin sol brasso i tira fora un sachetin de sangue. A ghe ne gavemo tanti litri che el nostro fisico gnanca el se ne incorse e invesse insieme ai sacheti dei altri donatori podemo salvare ea vita de tanti poricani. Zente che sofre in ospedae spetando ch’ea generosità, el bon core e un fià de bonavołontà de chi sta ben, ghe daga na man a vegnerghene fora. Vedarì che se fé sto picoło sacrificio dopo ve sentiré feissi e orgoliosi come se el core stesso ve disesse grassie par ‘ver ‘iutà un fradeo bisognoso. E se questo no basta a convinsarve, tegnive in mente che ghe xe l’iscrission de dirito sol libro dełe opare bone che tien San Piero. No so se me spiego. Vujo dire che co sto picoło sforso serchemo de fare un paregio co quełe cative che femo co tanta fasiità e sensa sforsi!

–   Seto Menego che te ne ghe quasi convinti, se no te dispiase vegnemo compagnarte e dopo…. co semo là decidemo.

Ceronte