Jero sentà fora al bar a ciaparme ‘na spiera de sołe, soło come un pandoło, sperando che passasse qualcun par scambiare do parołe. Manco małe che vedo vegner ‘vanti Bepi parché scominsio a sentire che ła solitudine me deventa senpre più un mortorio. Adiritura go trovà un proverbio che pare fato proprio par mi: “Uno soło no sta ben gnanca in Paradiso”. Da un fià de tenpo credo proprio che ła sia cussì.
Intanto xe rivà Bepi tuto nero intavanà, el se senta vissin de mi e sensa dire ne tre ne quatro el se ordina un goto de spuma.
Ma varda che modi a go pensà, sicuramente ghe xe ‘ndà małe qualche mestiero. Decido de darghe paroła, par vedare se’l se sbloca. Parché bisogna dire che Bepi xe un caro amigo da tanti ani, se poe rajonare, fare ła batuta de spirito, contarse e barseete o e disgrassie del giorno e se ocore un piassere el te ło fa vołentieri.
– Ciao Bepi, cossa gheto stamatina che gnanca te sałudi.
– Ah Toni Toni, beato ti che te si ti soło!!! No te se cossa vol dire ‘vere na femena su pai pie che no ghe va mai ben gnente, senpre drio brontołare. Ła me ga roto i zebedei che no te digo quanto, go ciapà ła porta e so vegnù via par no rovinarme…
A so restà de sasso. Serto che no ghevo miga messo in conto che fusse cussi fadiga ‘ndar d’acordo co‘na dona. Mi de amighe ghe ne go tante e fin ‘desso gero convinto che bastasse decidarme a farme vanti co una e gavaria ressolto ła situassion, ma a sentire Bepi me xe passà tute e smanie. Pareva che’l me ghesse łeto el pensiero e prima che ghe domandasse el so parere el me gheva za da ła risposta.
– Ma se poe savere cossa ła te ga fato stamatina?
– Stamatina? A xe na vita che no ghe va ben gnente: Co fasso ła docia sbianso da partuto, co me cambio no meto ła roba onta neła sesta, co camino łasso inpronte par tuta ła casa, se fasso el café mi, o el xe massa łongo o massa curto o sensa sucaro o massa dolse, se ‘tendo ła pignata de sicuro va parsora, se…
– Basta par carità, go capio tuto, te gera vegnù voja de massarla! Se vede che te si capità małe, no credo che łe femene sia tute cussì?
– Te ghe rason, no łe xe tute cussì… ghe ne anca de pezo! Toni ‘scolteme mi che go fato ł’esperiensa “xe mejo soli che mal ‘conpagnai” !!!
Ceronte